Ифтитоҳи корхонаи истеҳсоли халтаҳои полипропилении ҶДММ «Азияполитекс» дар Минтақаи озоди иқтисодии Суғд
.2023 , шаҳри Хуҷанд
1 апрел Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Минтақаи озоди иқтисодии Суғд бо пахши тугмаи рамзӣ корхонаи истеҳсоли халтаҳои полипропилении Ҷамъияти дорои масъулияти маҳдуди «Азияполитекс»-ро ба кор дароварданд.
Корхонаи нави саноатӣ дар доираи тадбирҳои созандагӣ ба ифтихори 35-солагии Истиқлоли давлатии Ҷумҳурии Тоҷикистон ва татбиқи ҳадафи чоруми миллӣ – саноатикунонии босуръати кишвар аз тарафи соҳибкорони ватанӣ Миразиз Усмонов ва Илҳомҷон Бобоҷонов бунёд гардидааст.
Фаъолияти корхонаи мазкур ба таври шабонарӯзӣ ба роҳ монда шуда, дар се баст 300 нафар бо ҷои кори доимӣ ва маоши хуб таъмин гардиданд.
Дар корхона панҷ хати муосири технологӣ, ки аз Ҷумҳурии Мардумии Чин ва Туркия ворид гардидааст, бо ҷалби мутахассисони ватанӣ васлу насб шуда, халтаҳои полипропилении калонҳаҷм бо ғунҷоиши аз 500 киллограм то 3 тонна истеҳсол карда мешавад.
Ба Пешвои миллат муҳтарам Эмомалӣ Раҳмон иттилоъ дода шуд, ки иқтидори истеҳсолии корхона дар як моҳ то 13 ҳазор дона халтаҳои полипропилении калонҳаҷм буда, солона ба зиёда аз 156 ҳазор дона мерасад.
Тамоми номгӯи маҳсулоти истеҳсолшаванда аз лиҳози намуд ва сифат ба меъёрҳои байналмилалӣ ҷавобгӯ аст.
Сохтмони корхонаи мазкур соли 2018 оғоз гардида, дар масоҳати умумии 1 гектар бо сатҳу сифати баланд ба анҷом расонида шудааст.
Халтаҳои полипропилении истеҳсоли ин корхона сифати баланд дошта, барои ангишт, семент, ғалладона ва дигар навъи маҳсулоти кишоварзӣ пешбинӣ шудааст.
Бо дарназардошти босифат будани халтаҳои калонҳаҷми корхона муҳлати истифодаи он тӯлонӣ буда, дар натиҷаи интиқоли дилхоҳ маҳсулот фарсуда намегардад.
Соҳибкорон аллакай дар баробари таъмини талаботи бозорҳои дохилӣ, истеҳсолотро бештар карда, содироти ин навъи маҳсулоти ватаниро ба кишварҳои хориҷа низ ба роҳ мондаанд.
Ҳадаф аз таъсиси корхонаи истеҳсоли халтаҳои полипропилении калонҳаҷм тақвияти иқтидори истеҳсолии вилояти Суғд мебошад.
Корхонаи мазкур дорои ошхона барои 100 нафар, ҳуҷраи либосивазкунӣ ва дигар ҳуҷраҳои корӣ мебошад, ки ҳамаи онҳо бо мизу курсӣ ва дигар шароити мусоид муҷаҳҳазанд.
Дар ҳамин ҷо ба Президенти Ҷумҳурии Тоҷикистон муҳтарам Эмомалӣ Раҳмон намунаи маҳсулоти истеҳсолии корхона муаррифӣ карда шуд.
Сарвари давлат муҳтарам Эмомалӣ Раҳмон ба сифати маҳсулоти истеҳсолии корхонаи навбунёди Ҷамъияти дорои масъулияти маҳдуди «Азияполитекс» баҳои баланд дода, ба соҳибкорон ва кормандон ҷиҳати афзун намудани ҳаҷми истеҳсолот ва баланд бардоштани иқтидори содироти он ба хориҷи мамлакат маслиҳатҳои муфид доданд.
facebooktwitter
kaynak:http://www.president.tj/node/30413?utm_source=dlvr.it&utm_medium=twitter